"ہاں تو آپ کو شرم نہیں آئی۔۔"
کہتے ہوئے اس نے فاصلہ بڑھانے کو اس کے سینے پر ہاتھ رکھا جس کی نگاہیں بے تابانہ
اس کے نقوش سے لپٹ رہی تھیں۔۔
"جھوٹ بولتے ہوئے۔۔' اس کی آواز لرز
اٹھی۔
"جعلی رپورٹ بنواتے ہوئے۔۔" وہ
سسکنے کو تھی۔
"کورٹ میں اتنے مردوں کے سامنے میری ذات
کو تماشا بناتے۔۔" بولتے ہوئے اس کی آنکھیں بہنے لگیں۔
"آپ تو جانتے ہیں نا کہ آپ باپ نہیں بن
سکتے۔۔" وہ بچوں کی طرح رونے لگی۔
"پھر بھی آپ نے مجھے اپنے وکیل سے ذلیل کروایا۔۔۔"
وہ اذیت بھری نگاہوں سے اسے ہی دیکھ رہی تھی جبکہ بدر تو بس اس کا رونا دیکھ رہا
تھا۔
"اس۔۔۔س۔۔ نے۔۔ کک۔۔ کیا کہا۔۔ آ۔۔۔ آپ
نے سنا نہیں۔۔۔ ججھ۔۔۔جھوٹی رپورٹ دکھا کر کہتا کہ۔۔۔ بب۔۔۔بچہ کس کا ہے۔۔"
ہچکیوں کے درمیان شکوہ کرتی وہ اس پل بھول گئی کہ بدر کی مردانگی پر سوال اٹھانے
والی وہ خود تھی اور بھول تو وہ خود بھی گیا تھا۔۔ سب۔۔۔ سب کچھ پیچھے رہ گیا تھا۔
علیشہ کے الزامات ۔۔۔ اس کی کم ظرفی۔۔ عدالت میں ہوئی توہین۔۔ ابھی کچھ دیر پہلے
پڑا وہ تھپڑ۔۔ سب کچھ اس لمحے جیسے محو ہو گیا تھا۔۔ کچھ واضح تھا تو علیشہ چوہان
کا وجود۔۔ اس کے آنسو۔۔ آنکھوں کی اذیت ۔۔ آواز کا بھاری پن۔۔ وہ ہار گیا۔۔ ایک
بار پھر۔۔ وہ جسے آج تک کمرۂ عدالت میں بڑے سے بڑا وکیل شکست نہ دے سکا تھا اسے وہ
چھوٹی سی لڑکی شکست فاش دے گئی تھی۔ ہاں وہ بیرسٹر بدر لغاری۔۔ جسے دشمن بے بس نہ
کر سکے تھے وہ اپنی بیوی علیشہ چوہان کے سامنے بے بس ہو گیا تھا۔
